Rijeka Tušina je planinska rijeka koja nema jedan glavni izvor, već nastaje spajanjem više izvora i potoka. Počinje svoj tok ispod planine Somine, u blizini sela Krnja Jela, na nadmorskoj visini od oko 1200 metara. Ukupna dužina njenog toka iznosi približno 10 kilometara.
U gornjem dijelu toka rijeka protiče kroz ravničarski predio sela Krnja Jela i Tušina, po kojem je i dobila ime. Prema narodnom predanju, ime Tušina potiče od turske riječi „Tuh“, što znači siga (sedimentna, taložna stijena). Samo korito i obale rijeke bogate su upravo ovim naslagama sige.
Ravničarski tok rijeke završava se ispod Borove Glave, gdje Tušina uklesa svoje korito u dubok kanjon, čija dubina prelazi 150 metara. Nakon približno deset kilometara toka, rijeka se uliva u rijeku Bukovicu, u blizini manastira Podmalinsko.
U rijeci Tušini živi autohtona vrsta potočne pastrmke, a prisutna je i alohtona vrsta kalifornijske pastrmke, zbog ribnjaka koji se nalazi na samoj rijeci.